Алааспар тиийэммин, аҕабын санатар
Аарыма тиит маһы кууһаммын уоскуйдум,
Чанчыгым күл курдук күкээрбит да буоллар,
Мин кыра оҕолуу кинини суохтуубун.
Хос ырыата:
Мин аҕам оттубут оһоҕун суоһугар
Күн бүгүн сүрэҕим иттээри тардыһар,
Хараҥа да түүҥҥэ сандаарар сулуһа
Мунаары гыннахха ыллыкпын сырдатар.
Саарбахтыыр, мунаарар күннэрбэр санаабар
Мин аҕам тыллара иһиллэр курдуктар.
Сүбэтэ-амата кутуллар кулгаахпар,
Амарах санаата дууһабын уоскутар.
Хос ырыата:
Мин аҕам оттубут оһоҕун суоһугар
Күн бүгүн сүрэҕим иттээри тардыһар,
Хараҥа да түүҥҥэ сандаарар сулуһа
Мунаары гыннахха ыллыкпын сырдатар.
Сиппэтэх санаатын, туолбатах олоҕун
Ситэрэ сатааммын мин киһи буолбутум.
Барыта киниттэн – билэрим, сатыырым,
Сахалыы сэмэйдик олохпун салгыырым.
Хос ырыата:
Мин аҕам оттубут оһоҕун суоһугар
Күн бүгүн сүрэҕим иттээри тардыһар,
Хараҥа да түүҥҥэ сандаарар сулуһа
Мунаары гыннахха ыллыкпын сырдатар.
Уолчааммын сиэтэммин дойдубар тиийиэҕим,
Аҕаккам сэһэнин киниэхэ кэпсиэҕим,
Санатыам киниэхэ төрүтүн-силиһин,
Инники кэскилин алҕааммын этиэҕим.