[Куплет]:
Ата Джуртха элтген джолла кесилиб,
Онглуракъла чыкъдыкъ энтда бир джазгъа.
Тюе джыйын барад къумну тизилиб,
Ала бара болурламы Кавказгъа? x2
[Куплет]:
Башчы тюе кёллендиред джыйынын,
Тири атлайд ант этгенча талмазгъа.
Башчы болса, бир оноугъа сыйыныб,
Сюркелиб да джетер эдик Кавказгъа. x2
[Куплет]:
Кесинг онгсуз болсанг, кимге не айыб?!
Кюн таякъ да-къамчид мында онгсузгъа!
Тюеле уа кетгендиле ташайыб?!
Ала джетген болурламы Кавказгъа?! x2
[Куплет]:
Джол азыгъы боллукъ эсек да джолда,
Кюрешейик башха джуртда къалмазгъа.
Ёлмей джетсенг, насыб кёрген,ол анда
Ёлгенледен салам айтыр Кавказгъа! x2
[Куплет]:
Бу джуртсузлукъ барад бизни тюб этиб,
Энтда саулай чыгъарбызмы биз джайгъа?
Ёлгенлени сыртыбызгъа джюк этиб,
Атланайыкъ, мадар табыб, Кавказгъа! x2