Озсала да айла джылла эсим къайтад,
Онсегизден джыйырма толугъан джыллагъа
Джюрек отум саугъа джыр бла салам айтад
Чекни сакълай тангны атдыргъан джашлагъа
Джаз келди да, джилек дедим атынга,
Джай келди да, наныкъ дедим атынга,
Кюз келди да, дугъум дедим атынга,
Къыш чилледе баралмадым къатынга.
Бек узакъды экибизни арабыз,
Минг къычырым джол барсам да джетмезча,
Бир джомакълы къалды бизни арабыз,
Кекде учхан мелек, келиб, билмезча.
Тамбла джангы джылны мен сюелеме,
Чекни сакълай, джай кюн тюше эсиме,
Ариуум сени кёргюзтсем кёзюме,
Учхунама соруу сора кесиме:
Ким сакълайды къышхы кече къатынгы?
Ким айтады сени ариу атынгы?
Ким сылайды сени къутас чачынгы?
Унутдуруб меннге этген антынгы?
Сюймеклигими сакъласанг джыл ётер,
Къыйнаса да, экинчи да терк кетер,
Сени, нанынг, къууанч хапар бла джетер,
Халкъ, джыйылыб, экибизге той этер!
Джаз келгенлей, джиллек дерме атынга,
Джай келгенлей, наныкъ дерме атынга,
Кюз келгенлей, дугъум дерме атынга,
Къыш чилледе къысылырма къатынга.
Орайдара ойда ори орида
Орайдара ойда орида
Кюз келгенлей, дугъум дерме атынга,
Къыш чилледе къысылырма къатынга.
Къатынга